أول تعليق من السيسي على أزمة «سد النهضة»: «الأسد محدش ياكل أكله»
إسكان مصر- خاص:
طمأن الرئيس عبدالفتاح السيسي، المصريين، بشأن أزمة سد النهضة، وأعرب عن تفهمه قلق الشعب المصري.
وقال السيسي، خلال افتتاح المدينة الصناعية بالروبيكي، الثلاثاء: «المصريين قلقانين وأنا بقول قلقكم مشروع، وأنا معاكم فيه، لكن كل ما تقلق وتخاف اشتغل أكتر علشان تبقى جامد وتبقى قوي وقادر، كل ما تشتغل أكتر كل ما هتبقى قوي أكتر وماحدش هياخد حقك منك».
وأوضح السيسي: «الأسد محدش يأكل أكله، خليكم أسود، الأسد مش كلام، كل واحد في موقعه يبقي أسد صغير وكلنا هنكون أسد كبير، حقنا مش في المياه بس، محدش يقدر يجور علينا ولا في مصالحنا ولا أمننا القومي».
وقال الرئيس: «موضوع المياه بالنسبة لنا هو حياتنا.. بطمنكم علشان عدالة القضية، قضيتنا عادلة في موضوع المياه.. مطلبنا في المياه بيثبت عدالته هرم الجيزة، دي مياه بتجيلنا من ربنا من آلاف السنين، واتبنت عليها حضارتنا».
وأوضح السيسي: «نقول دائماً لأشقائنا في إثيوبيا والسودان أننا حريصون عليكم وحريصين على عيشتكم زى عيشتنا.. من حقكم توليد الكهرباء، زى ما أعلنتوا إن ده السبب وبنتمنالكم التوفيق بكل حب وبنوايا طيبة بشرط ألا يؤثر ذلك على المياه التي تأتي لنا، وتحدثنا في ذلك كثيرا في اللقاءات الثنائية والثلاثية».
وأردف «السيسي»: «ما تهددش وتقول كلام مالوش لازمة، أنا بحترم كل رأى لكن ماحدش يقول النهاردة هنعمل كذا وكذا».
وتطرق الرئيس إلى ما يردده البعض من آراء بشأن عمل عسكري، قائلاً: «إحنا بنتفاوض ودي معركة هتطول لأننا مش هنمضي على حاجة مش هتحققلنا مصلحة، المصلحة بتقول كلنا مستفيدين والضرر يكون مقبول علينا كلنا».
