نصائح لديكورات الشقق ذات المساحات الصغيرة

ناس كتير في بداية حياتهم الزوجية بتفضل أنها تسكن في شقق صغيرة ولأسباب مختلفة..زي مثلا ان مساحتها كويسة بالنسبة لاتنين متجوزين ولسة مأنجبوش أطفال دة غير ان تكاليفها بتكون أقل..وفي ناس تانية بتفضل الشقق الصغيرة عشان ترتيبها بيكون أسهل…..الخ. وزي ما احنا عارفين اختيار الديكور بيكون محير ومش حاجة سهلة وبالذات في الشقق الصغيرة اللي مساحتها بتبدأ من 60 متر..فعلشان كدة هنطرح عليك خطوات ممكن تساعدك في اختيار ديكور بسيط وأنيق وكمان يدي شكل أوسع لشقتك:

الإضاءة:

الإضاءة جزء أساسي من ديكور البيت وعامل رئيسي في الاحساس بمساحة الشقة لأنه كل ما بيكون الضوء أفتح وأكتر، كل ما هتحسي براحة أكتر وهتحسي كمان ان شكل بيتك أوسع.

 

الألوان:

الألوان الفاتحة من أكتر الحاجات اللي بتخلق بهجة وسعادة في البيت ودة لأنها بتساعد في دخول الضوء للبيت وبتخلي شكله أوسع. فيفضل انك تختاري الألوان الفاتحة للحيطان والعفش زي: اللون الأبيض والبيج واللون الأصفر والفستقي الفاتح والسيمون…الخ.

 

المطبخ:

“المطبخ الأمريكي” من أكتر الحاجات اللي عليها طلب الفترة دي لأن شكله بيكون بسيط وأنيق وكمان بيديكي الوسع اللي انتي عايزاه لأنه بيكون مفتوح على الصالة.

 

العفش:

خليك/ي عملية في اختيارك للعفش..يعني مثلا ممكن تستخدم/ي الترابيزة اللي بتفتح وبتتقفل بدل السفرة لأنها بتكون خفيفة ومش هتاخد مساحة كبيرة من شقتك .

 

.

 

.

 

الأرضيات:

استخدم/ي الأرضيات الباركيه أو السيراميك بدون سجاد لأن السجاد بيضيق مساحة الصالة.

 

أماكن التخزين:

من أهم الحاجات اللي ممكن تستخدمها في الشقق الصغيرة هي مساحات التخزين ودي بتكون معمولة عشان تحط فيها كل حاجتك و في الأغلب بيكون مكانها تحت السرير.

 

المرايات:

وجود المرايات الكبيرة في الغرف من أكتر الحاجات الي بتدي وسع للأوض وكمان بتسمح بدخول الضوء بشكل جيد .

 

الرفوف : 

اشتري الرفوف اللي ممكن تتحول لمكتب ودي من الأفكار الذكية اللي هتساعدك توفري فلوسك وتوفري مساحة أكبر لشقتك.