عقب نشر الحلقة الأولى .. النيابة تقرر حفظ التحقيقات لـعدم الأهمية .. وتوصي بقيدها في دفتر الشكاوى الإدارية
«إسكان مصر» تنشر نص مكالمات المتهمين في قضية «النوبارية الجديدة» - الحلقة الثانية
تفريغ المكالمات الهاتفية لم يحمل دليلاً يؤيد صحة الاتهامات.. وإخلاء سبيل المحبوسين على ذمة القضية
القصري لـ«مدير شركة النظافة»: «ما تصعش عليا.. بدل ما أوديه النيابة وأوديك معاه»..
القصري: «أنا مسكت محمد خطاب التنمية» .. ومحمد عبدالحميد يرد: «ده رخم أوی يا ريس»
إسكان مصر - خاص
ربما يعجبك
ردود فعل واسعة، تلقتها «إسكان مصر» عقب نشر الحلقة الأولى من تحقيقات النيابة في واقعة اتهام رئيس جهاز النوبارية السابق المهندس محمد عبد الحميد القصري بطلب والحصول على منافع مادية وعينية من شركة العبور للنظافة وخدمات البيئة، فعقب النشر بأيام قليلة أصدرت نيابة شرق القاهرة الكلية قراراً بحفظ القضية رقم 5573 لسنة 2020 والمعروفة بقضية «جهاز النوبارية الجديدة»، لعدم جدية الاتهامات وعدم جدوى الاستمرار في نظرها، وأمرت بقيدها كشكوى إدارية وإخلاء سبيل المحبوسن على ذمتها.
وتواصل «إسكان مصر» نشر الحلقة الثانية من سجل التحقيقات في هذة القضية وتفريغ كامل للمكالمات التليفونية التي جرى تسجيلها في تلك الواقعة لأطراف القضية، والتي لم تحمل إدانة أو دليلاً يدين المتهمين فيها.
حيث تم فُتح محضر بعد القبض على عدد من الأشخاص الذين وُجهت لهم اتهامات في تلك القضية، والتي هزت أرجاء هيئة المجتمعات العمرانية الجديدة، وكُتب فيه أنه وردت معلومات لعضو هيئة الرقابة الإدارية عبد الرحمن الحوام من مصادر سرية، تفيد طلب المهندس الراحل محمد عبدالحميد القصری، رئيس جهاز تنمية مدينة النوبارية الجديدة الراحل، مبالغ مالية ومنافع مادية على سبيل الرشوة من العديد من المقاولين والمواطنين المتعاملين مع الجهاز مقر عمله، وهيئة المجتمعات العمرانية الجديدة، وهم عبدالمنعم رفاعي حسين نصر، مدیر وشريك بشركة العبور لخدمات النظافة، ومحمد عبدالحميد محمد نصر، مدير وشريك بشركة النور لخدمات النظافة، مقابل إنهاء إجراءات صرف المستحقات الخاصة بشركة العبور من الأعمال المنفذةمن قبلها بمدينة النوبارية الجديدة، وذلك بوساطة خالد أبوالفتوح النادي عطية، سائق رئيس جهاز مدينة النوبارية الجديدة الراحل، وإسلام عزت محمد محمد على، أحد العاملين لدى الشركة المنفذة.
ووفقا للمحضر فإن التحريات أكدت طلب رئيس الجهاز الراحل مبالغ مالية ومنافع مادية على سبيل الرشوة من عبدالمنعم رفاعی حسين نصر، ومحمد عبدالحميد محمد نصر، مقابل إنهاء إجراءات صرف المستحقات الخاصة بشركتهم عن الأعمال المنفذه من قبلها بمدينة النوبارية الجديدة، وذلك بوساطة خالد أبوالفتوح وإسلام عزت محمد.
وأشارت التحريات إلى وجود اتصالات هاتفية تتم عبر الهواتف التي يستخدمها المتحرى عنهم، وإيماء لإذن نيابة أمن الدولة العليا المؤرخ في 30 ديسمبر 2019 والمتضمن مراقبة وتصوير وتسجيل اللقاءات والأحاديث التي تتم بين هؤلاء الأشخاص، والتي تتم بينهم مجتمعين أو منفردين في الأماكن العامة والخاصة ومراقبة وتسجيل المحادثات الهاتفية التي تتم عبر الهواتف الماذون بها وعليه، فقد أسفر تنفيذ الإذن عن الآتي:
أولا: بالنسبة للمحادثات الهاتفية الواردة عبر هاتف رئيس الجهاز الراحل، فقد وردت بعض المحادثات الهاتفية منها ما يلي:
بتاريخ 31/12/2019 تم رصد محادثة هاتفية بين القصري وعبدالحمید جاء فيها:
القصري: «مبروك بياخد منك مرتب ولا ما بياخدش؟»
عبدالحميد: «آه ياريس في حاجة ولا إيه؟.. بس ياريس ده بيورد عمال مش موظف»
القصري: «بياخد من عند سعادتك مرتب ولا لأ؟.. كلمة واحدة وملهاش تاني، ما تخدش وتدي معايا يا محمد»
عبدالحميد: «هو بيورد عمال وبياخد فلوس على العمالة اللي بتيجي»
القصري: «لأ له هوه؟»
عبدالحميد: «لا ياريس»
القصري: «ما تصعش على دين.. بدل ما أوديه النيابة وأوديك معاه»
عبدالحميد: «طيب في إيه وانا أحلها ليك»
القصري: «آه هاحلها بس قولي»
عبدالحميد: «بياخد عموله على العمال ياریس»
- بتاريخ 31/12/2019 تم رصد وردت محادثة هاتفية أخرى بينهما جاء فيها:
عبدالحميد: «عاوزك في 3 حاجات ياریس فاضي»
القصري: «أول واحدة»
عبدالحميد: «انت ازاى تطلع عمرة من غير ما تقولي»
القصري: «طالع يوم الخميس اللي جای».. «هو النهارده إيه؟»
عبدالحميد: «النهارده الأربع لا النهارده التلات.. ابعتلي خالد يوم الخميس»
القصري: «لا خالد إيه.. طلع خالد»
عبدالحميد: «طيب خلاص هنتقابل»
القصري: «نتقابل إن شاء الله»
عبدالحميد: «طيب خلاص أعدى عليك ولا نتقابل في القاهرة يوم الخميس»
القصري: «لا القاهرة إن شاء الله»
عبدالحميد: «خلاص نتقابل في أي وقت انت عاوزه»
-بتاريخ 2/1/2020 تم رصد محادثة ثالثة بينهما، وجاءت كالتالي:
القصري: «مستخلصك لسه مجاش ليه لحد دلوقتي»
عبدالحميد: «مش عارف ياباشا والله.. هستعجله دلوقتي حالا»
القصري: «ابعت حد يحركه يا محمد دلوقتي، انت مبعتش ليا الشركات اللى انت قولت لى عليها»
عبدالحميد: «ما انا قولت ليك هجيبه ليك النهارده ان شاء الله»
القصري: «طيب ابعتلى مستخلصك والنبي يا محمد»
عبدالحميد: «حالا دلوقتي»
- بتاريخ 2020/1/5 تم رصد محادثة أخرى بينهما، جاء فيها:
القصري: «مستخلصك عند المهندس محمود لازم يمضي عليه، لو سمحت تعالي شوف طلبات المهندس محمود في الشغل إيه وخلص مستخلصك من عنده.. أنا مسافر يوم الخميس آخر يوم عمل ليه يوم الأربعاء.. بكره إن شاء الله انت اللى تيجي تقعد مع المهندس محمود تشوف طلباته إيه في الشغل وتخلصه له».
عبدالحميد: «تمام حاضر يا ريس»
- بتاریخ 8/1/2020 وردت محادثة أخرى بين القصري وعبدالحميد كالتالي:
القصري: «خلاص يا حبيبي انا جبتهم التلاته وكله تمام التمام، وانت اللى سايق وهما يدوك ملاحظاتهم.. والتلاته قعدوا مع بعض وقولتلهم نصفى مفيش خلافات، ای حاجة هتخبط فيه أنا وكل الأمور تمام التمام».
عبدالحميد: «طيب الراجل ده بقا مش عارف أقعد معاه يا ريس، اجتماعات وحوارات وأفلام»
القصري: «مليش دعوة أنا بقا شوف انت، الواد أيمن ماتقبضوش انا اديته 4000 جنيه»
عبدالحميد: «هاديهم لخالد مانا قولت لخالد هديهم ليك.. ما دول هايبقو مع خالد بكره، انت مشيت يا ريس.. أنا مش هامشی غير لما أقابل الراجل ده واديك تمام»
القصري: «دي قصتك انت.. الشغل زي ما هو ماشي وزي الفل ولو في أي مشكلة بلغني على الواتس اب..، الشغل زي ما هو ماشي مفيش أي مشاكل بين محمد خطاب وبين عاشور وبين التاني وانت اللى سايق.. «قالوا لي احنا اللي نسوق، قولتلهم هو انا اللي بسوق ولا انتم، فقالو لي لا احنا، فقولت لهم خلاص يبقا هو اللي يسوق، هو اللي في الملعب والمشكلة اللي تطلع توجه لها».
عبدالحميد: «تمام ياریس مظبوط.. الله ينور، وانا هقعد معاهم ياريس واديك تمام»
القصري: «التلاته قعدت معاهم وقولت ليهم أی خلافات ننساها علشان كله هيخبط فيه انا»
عبدالحميد: «متشكرين جدا وتروح وترجع لينا بالسلامة ياريس»
-بتاریخ 18/1/2020 تم رصد محادثة هاتفية بين محمد القصري وخالد أبوالفتوح، جاء فيها:
القصري: «انت اخدت الفلوس من عمر بتاع النظافة»
أبوالفتوح: «أيوه»
القصري: «ماقولتليش ليه؟»
أبوالفتوح: «عمر إيه بتاعت مین»
القصري: «فلوس ایمن»
أبوالفتوح: «ما انت قولت ليه سيبه هناك في النوبارية»
القصري: «أمال مين اللى أخدها منك»
أبوالفتوح: «سبتها في المكتب هناك ادتها لعاطف.. عمر اداها لعاطف»
القصري: «اما بكلم محمد بيه عبدالحميد بقوله ابعتهولي بكره بيقولی ما خالد خدها»
أبوالفتوح: «ما انت قولتي سبها في النوبارية مالكش دعوة بيها هو عاطف خدها منهم»
-بتاریخ 26/1/2020 وردت محادثة هاتفية بين القصري ومحمد عبدالحميد، كالتالي:
القصري: «خد تليفون اللواء يسرى عاوزك تاخد النظافة بتاعت مارينا بيقول لي عاوز حد ياخد النظافة.. كير سرفیس مطلع عينه فقولت له عندي العبور شغالة زى النار».
عبدالحميد: «مارينا زی الفل ياباشا»
- بتاریخ 26/1/2020 وردت محادثة هاتفية أخرى بين القصري وعبدالحميد، كالتالي:
عبدالحميد: «كلمته وقالي عاوز سابقة الأعمال هبعته له بعد بكره وان شاء الله يبقى فيه خير»
القصري: «ربنا يوفقك»
عبدالحميد: «بس خلى بالك رئيس الجهاز هناك حاتم ها زعيم .....الأوحد»
-بتاریخ 26/1/2020 وردت محادثة هاتفية ثالثة بين القصري وعبدالحميد، كالتالي:
القصري: «يعني انت مش عاوز تروح هناك ولا ايه»
عبدالحميد: «لا رایح»
القصري: «طيب خايف من حاتم ليه»
عبدالحميد: «هو انا بخاف ياريس انت عارف عنى اني بخاف»
القصري: «لا ما أنا عارف، وعارف القصة كلها وبعدين فهمه وقول له إنك ماسك الخط كله يعني انت ماسك من السادات لحد البرج»
عبدالحميد: «هوديله الورق بعد بكره وهقابله في القاهرة الأسبوع اللي جاي»
القصري: «خد بعضك بكره وروح قابل العميد وائل غازي»
عبدالحميد: «خلاص وانا طالع إسكندرية هعدى عليه أقوله إيه بقى»
القصري: «قوله انا جاي ليك من طرف المهندس محمد القصری بخصوص كذا كذا كذا»
عبدالحميد: «طيب خلاص تمام»
ثم أعطى الأول الثاني رقم هاتف المحمول الخاص بالمدعو وائل غازی.
ثانيا: بالنسبة للمحادثات الهاتفية الواردة عبر هاتف آخر لرئيس الجهاز الراحل، حيث وردت بعض المحادثات الهاتفية منها ما يلي:
- بتاريخ 31/12/2019 وردت محادثة هاتفية بين محمد القصري ومحمد عبدالحميد تضمنت الحديث حول عدد من الأمور والمخالفات الموجود بجهاز المدينة وهيئة المجتمعات العمرانية الجديدة، وجاءت كالتالي:
القصري: «يعني انا مسكت محمد خطاب التنمية»
عبدالحميد: «ده رخم أوی يا ريس»
القصري: «معلش الصح هو الصح واللى احنا بنعمله صح ان شاء الله بإذن الله وماتقلقش.. مبروك مش ها يطلع بره الدايرة»
عبدالحميد: «وشكلت لجنة انت يا ريس علشان نقل الصرف يتم عن طريق شركة النظافة»
القصري: «ولا تسوى تعريفة ولا ها تعمل حاجة»
عبدالحميد: «انا عارف يا ريس»
عبدالحميد: «وأنا يا ريس ما اقبلش إن حد يقول عليك كلمة غلط علشان انت راجل محترم»
القصري: «الصح صح والغلط غلط»
- بتاریخ 9/1/2020 وردت محادثة أخرى بين القصري وعبدالحميد كالتالي:
عبدالحميد: «الحاجة اللى حضرتك طلبتها خلصت»
القصري: «أنت فاكرني خالع ولا ايه؟»
عبدالحميد: «آه»
القصري: «لالا واخدها رسمی یا راجل لالا»
عبدالحميد: «طيب احسن ياباشا روح كده علشان تريح شويه كام يوم كده»
القصري: «لا أسبوع.. الحد اللي جاي هكون عندك ان شاء الله.. إيه»
عبدالحميد: «الحاجات اللى انت طلبتها في النظافة جاهزة تقدر تاخدها دلوقتي وتشوفها»
القصري: «هو الواد خالد جالك النهارده»
عبدالحميد: «لا ماشوفتهوش»
القصري: «طيب ماشي انت مش عاوز أي حاجه من هنا»
عبدالحميد: « ربنا يخليك ياباشا»
القصري: «طيب شوف أو انت لو عاوز أي حاجه من هنا ابعتلي على الواتس آب»
عبدالحميد: «ربنا يخليك ياباشا ما انا بعت ليك على الواتس خلاص»
القصري: «طيب يا حبيبي ماشي»
- بتاريخ 11/1/2020 وردت محادثة أخرى بين رئيس الجهاز الراحل ومحمد عبدالحمید، تحدثوا خلالها عن عدد من الموضوعات المتعلقة بالصرف الصحي بمدينة الرحاب، كالاتي:
-بتاریخ 12/1/2020 تواصلت المحادثات الهاتفية بين محمد القصري ومحمد عبدالحميد، كالآتي:
القصري: «خالد هيجى ليك بكره علشان الفلوس بتاعت الواد ایمن؟»
عبدالحميد: «ما أنا بعتها لأيمن مع المشرف»
القصري: «مش انا قايلك انا اديتله»
عبدالحميد: «عادى طيب انا هشوف ايه اللي حصل»
القصري: «مش انا قولت ليك ان انا اديتله.. طيب خلاص خليها مع المشرف اللى هناك بقا»
عبدالحميد: «حاضر»
القصري: «قوله متدهاش للواد ما هو أنا مشيت الواد»
عبدالحميد: «انا قولت له أديها لخالد»
القصري: «منا مشيت الواد انا اديته الفلوس وقولت ليه امشي، خليها مع المشرف اللي معاك مش عبدالله ولا عمر»
عبدالحميد: «عمر»
القصري: «خلاص خليها مع عمر قوله خليها معاك لحد لما يجي الريس ميدهاش لخالد ولا لزفت»
عبدالحميد: «ماشي حاضر»
القصري: «والموضوع التاني فشل، لما اجي هابقى اقولك بقی»
عبدالحميد: «انهي موضوع ياباشا»
القصري: «بتاع 35 فشل»
عبدالحميد: «ليه»
القصري: «لما اجي لما اجي.. انت بتقول إيه القاهرة الجديدة مالها»
عبدالحميد: «ما موجودين في الحاجة»
القصري: «لا لا لا مش عارف، مش هينفع، هو مش عارف يعملها»
عبدالحميد: «طيب هي مع مين وانا اقول له»
القصري: «مش هينفع الكلام بقا لما اجيلك»
عبدالحميد: «طيب ماشي عملوا إيه في القاهرة الجديدة»
5- بتاریخ 12/1/2020 وردت محادثة جديدة بين القصري وعبدالحميد، تضمنت الحديث حول عدد من الموضوعات المتعلقة بهيئة المجتمعات العمرانية الجديدة واتفقا خلالها على التقابل سويا.
6- بتاريخ 18/1/2020 وردت محادثة أخرى بينهما اتفقا خلالها على اللقاء سويا بكافيه «كوستا» بشارع الميرغني أمام نادى هليوبوليس.
- بتاريخ 19/1/2020 وردت محادثة بينهما كالآتي:
عبدالحميد: «والنبي ياريس في طلب كمان»
القصري: «إيه؟»
عبدالحميد: «الباشمهندس محمود عاوز يسلم جواب لعمر إن مفيش معدات، مع أن المعدات شغالة قصاده»
القصري: «طيب خلاص هاخلص لك الموضوع ده إن شاء الله»
عبدالحميد: «مش هاخلی عمر يستلم بقا ياريس»
القصري: «لا متخلهوش يستلمه»
- بتاريخ 20/1/2020 وردت محادثة هاتفية جديدة بينهما كالآتي:
عبدالحميد: «انا سامع آن بتاع برج العرب ده صاحبك وحبيبك»
القصري: «آه عاوز إيه»
عبدالحميد: «طيب مفيش تليفون كده يا ريس»
القصري: «عاوز إيه تروح له ولا تروح لمحمد عبدالرحمن النائب»
عبدالحميد: «لا هاروح له هو وبعد كده أروح للنائب»
القصري: «حاضر هاكلمهولك حاضر»
عبدالحميد: «انا معايا ربع ساعة وهكون عنده ان شاء الله.. «لو مكلمتهوش هقول للحاجه انك هاتتجوز»
-بتاريخ 21/1/2020 وردت محادثة أخرى بينهما كالآتي:
القصري: «هو انت باقي على العملية بتاعتك كام شهر»
عبدالحميد: «باقي ممكن 8 شهور يا ريس أو تسعة، ولا عاوز بالظبط»
القصري: «اصل معتمد بيقوله اقل من 6 شهور»
عبدالحميد: «آه.. أصل هو بعت علشان ياخد موافقة على الطرح.. طيب ما تستنى شويه طيب ياريس»
القصري: «ليه؟»
عبدالحميد: «استنی أنا ليه 25% اخدها ياريس طيب الأول والجهاز هيبقا كسبان»
القصري: «طيب ما انا هاديهوملك، ما أنا طبعنا اديك بالسعر القديم أحسن لي، هو انا عارف السعر الجديد هيجي لي كام»
عبدالحميد: «أه طبعا ولسه بدری، هيزيد طبعا يا ريس»
القصري: «اصل انت لفت نظري لما قولتلي ان احمد عبدالمرضى باعت حد يضربك وبتاع»
عبدالحميد: «خليها شوية عقبال ما ناخد»
القصري: «ده انا هفرمك هاخد منك 6 شهور»
عبدالحميد: «يا باشا وعاوز 6 کمان بنفس الأسعار مفيش مشكلة«
القصري: «انا هاخد منك سنة إن شاء الله»
ثالثا: بالنسبة للمحادثات الهاتفية الواردة عبرهاتف محمد عبدالحميد محمد نصر حيث وردت بعض المحادثات الهاتفية منها ما يلي:
- بتاريخ 5/1/2020 وردت محادثة هاتفية بين عبدالحميد وشخص يدعى شريف عبدالمنعم محامي حر وشريك بشركة العبور، كالتالي:
شريف: «مين اللي قالك يا محمد تقابل الراجل بتاع النوبارية بكره؟»
عبدالحميد: «قصرى»
شريف: «طيب ماشي ياله»
عبدالحميد: «ايه السبب يعني»
شريف: «ماشي لما اجيلك ياله السبب لما اجي ليك طيب»
-بتاريخ 19/1/2020 وردت محادثة هاتفية بين عبدالحميد ومحمد القصري رئيس الجهاز الراحل، كالتالي:
القصري: «كله تمام یا عمده»
عبدالحميد: «تمام يا ريس»
القصري: «اطلع للمهندسة سلوى انا قالت لي انا طالبه منه حاجات بسيطه جدا هيعملها وهيبقي تمام التمام إن شاء الله»
عبدالحميد: «ربنا يخليك لينا يا ريس»
رابعا: بالنسبة للمحادثات الهاتفية الواردة عبر هاتف آخر لمحمد عبدالحميد محمد نصر، حيث وردت بعض المحادثات الهاتفية منها ما يلي:
- بتاریخ 2/1/2020 وردت محادثة هاتفية بين عبدالحميد وشخص يدعی عمر، كالتالي:
عبدالحميد: «شوف لي مين اللى معطل المستخلص علشان تدخل لمدير مكتب الريس»
عمر: «حاضر»
-في 2/1/2020 ردت محادثة هاتفية بين عبدالحميد وشريف عبدالمنعم، كالتالي:
شريف: «مش بترد ليه؟»
عبدالحميد: «كان معايا القصري على التليفون»
شريف: «ليه؟»
عبدالحميد: « محمود اللي هو النائب موقف المستخلص في حاجات عاوز يعملها ماتعملتش، فالمهندس قصري قالى تعالى له بكره حل له مشاكله علشان يمضيلك على المستخلص»
شريف: «ماشي مش مشكلة»
- بتاریخ 2/1/2020 وردت محادثة هاتفية بين عبدالحميد وإسلام عزت محمد، كالتالي:
عبدالحميد: «اسلام بس خالد»
إسلام: «خالد تمام»
عبدالحميد: «هنديله الشهر ده 35»
إسلام: «خالد النوبارية صح؟»
عبدالحميد: «أه اللي بياخد 15، انت هاتكلمه هاتقوله ان استاذ محمد مبلغني ان ليك 20 لوحدهم و15 یعنی 35، تحب تيجي تاخدهم النهارده جزء ويوم الحد جزء، ولا تاخدهم كلهم مع بعضهم الحد، وياريت ترمي للحد يعني»
إسلام: «طيب لو هياخد جزء هياخد كام؟»
عبدالحميد: «معاك 15»
إسلام: «لا مش هيكمل، هيبقا معايا 13 تقريبا»
عبدالحميد: «ماشي هات اديك الباقي، هتكلمه ولا هتسيبه يكلمك؟»
إسلام: «مش مشكله اتصل بيه دلوقتي لو انت عاوز دلوقتي»
عبدالحميد: «كلمه قوله دلوقتى استاذ محمد مبلغنی بكذا»
- بتاریخ 2/1/2020 وردت محادثة هاتفية بينهما مرة أخرى تحدث خلالها إسلام قائلا: «خلاص أنا كلمت خالد على يوم الحد بإذن الله»
- بتاريخ 5/1/2020 وردت محادثة هاتفية بين عبدالحميد وعبدالمنعم رفاعی، كالتالي:
عبدالحميد: «بكره ان شاء الله هتوكل على الله»
عبدالمنعم: «بكره ليه»
عبدالحميد: «علشان الراجل بتاع النوبارية عاوزنا»
عبدالمنعم: «مين ده؟»
عبدالحميد: «النائب اللى ماسك مكان الريس، علشان الريس راح يعمل عمرة، فموقف النسبة علشان نظبط له حاجه كده فنروح له الصبح وبالمرة هنكمل على إسكندرية بقي»
عبدالمنعم: «طيب ماشي خطاب الضمان هيبقى معاك جاهز بكره انا عملته دلوقتي اهو»
عبدالحميد: «اخده وانا ماشي اهو»
- بتاریخ 6/1/2020 وردت محادثة هاتفية بين عبدالحميد ومحمد القصري، كاتالي:
عبدالحميد: «دلوقتى أنا في الجهاز عند حضرتك ولا المهندس سعید موجود»
القصري: «هو انا مش طلبت سعادتك بالليل وانت ماردتش عليا»
عبدالحميد: «والله ماشوفتهاش غير الصبح»
القصري: «علشان اقول لك ما تجيش، ما طلبتنيش الصبح ليه، هو محمود النهارده مش موجود کنت قابلته في 6 أكتوبر»
عبدالحميد: «ده ولا سعيد الأمن برضه موجود»
القصري: «سعيد ما هو معايا اهو»
عبدالحميد: «انت في الجهاز يعني ولا فين»
القصري: «انا في الجهاز اهو بلف داخل عليك دقيقة واحدة وداخل عليك»
-بتاریخ 8/1/2020 وردت محادثة هاتفية أخرى بين عبدالحميد والقصري، كالتالي:
عبدالحميد: «كله تمام يا ريس»
القصري: «طيب الله ينور»
عبدالحميد: «هاجيله يوم الاتنين انسق معاه الشغل واعمل معاه خطة الشغل من الالف للياء، علشان مينفعش نسيبلك الجهاز طول ما انت مش موجود لازم يبقى الجهاز مية مية»
القصري: «طيب مية مية»
- بتاریخ 9/1/2020 وردت محادثة هاتفية بين عبدالحميد وإسلام عزت، كالتالي:
عبدالحميد: «هو ايمن هتحط فلوسه فين»
إسلام: «ايمن مين؟»
عبدالحميد: «ایمن اللي هو المشرف، علشان خالد دفعها بتاع النوبارية»
إسلام: «ايمن انا كنت هابعتله في فيزته»
عبدالحميد: «طيب اسأل خالد السواق الأول»
إسلام: «خلاص انا هابعته لعمر وعمر يبقى يتصرف يشوف مين اللى دفعها ويدهاله»
عبدالحميد: «طيب والـ35؟»
إسلام: «هنزلهم عندك، هنزلهم في الفيزا اللى احنا مظبطنها»
عبدالحميد: «آه واول لما تخلص كلمني علشان ابلغ القصري.. طيب شوف موضوع ایمن واول لما تخلص موضوع 35 ابقا اقولی»
إسلام: «لا، تمام حاضر اول لما اعمل التحويل هقولك»
بتاريخ 9/1/2020 وردت محادثة أخرى بين عبدالحميد وإسلام عزت، كالآتي:
إسلام: «خالد النوبارية كان كلمني على الفلوس طبعنا انا مش عارف اتكلم معاه اقول له ايه بالظبط؟»
عبدالحميد: «قول له يوم الحد»
إسلام: «انا بعت الـ35، اقوله انا بعت الـ35 وهو هيفهم يعني»
عبدالحميد: «لا لا قوله يوم الاحد وانا هخلص معاه»
إسلام: «طيب خلاص تمام»
عبدالحميد: «الحاجه نزلت؟»
إسلام: «ممكن يكون قدامها نص ساعة ولا حاجة»
-بتاريخ 18/1/2020 وردت محادثة هاتفية بين عبدالحميد وإسلام على، كالتالي:
عبدالحميد: «الفيزا اللي كان فيها الـ35 ماشی»
إسلام: «اه تمام»
عبدالحميد: «هو جه يسحب ماعرفش يتعامل، لازم نتصل بخدمة العملاء ولا نعمل ايه»
إسلام: «أه لازم نعمل»
عبدالحميد: «بس كانت الفلوس نزلت»
إسلام: «لا خلاص يقدر يستخدمها على طول بمجرد بس ما يعمل رقم سری جدید»
عبدالحميد: «بس كده، طيب لو مقدرناش بقی والموضوع باظ برقم البطاقة ولا بنعمل ايه»
إسلام: «يبقى برقم البطاقة اه»
-بتاریخ 20/1/2020 وردت محادثة هاتفية بين عبدالحميد وعمر، كالتالي:
عبدالحميد: «أخبار المستخلص ايه؟»
عمر: «خلاص طلع النهارده الجواب»
عبدالحميد: «طيب فين سابقة الاعمال»
عمر: «بيعملهولی محمد خطاب»
خامسا: بالنسبة للمحادثات الهاتفية الواردة عبر هاتف خالد أبوالفتوح النادي عطية حيث وردت بعض المحادثات الهاتفية منها ما يلي:
- بتاریخ 2/1/2020 وردت محادثة هاتفية بين أبوالفتوح وإسلام عزت، كالتالي:
أبوالفتوح: «ياباشا الحاج محمد كلمك ولا»
إسلام: «آه كان مكلمنى ومبلغني على 20 و15، بس ان شاء الله هيبقى معايا يوم الحد الصبح ان شاء الله»
أبوالفتوح: «النهارده الباشمهندس کان بيقول لي اتصل بالحاج محمد وعدي عليه، وقولت أأكد معاك انت»
إسلام: «لا والله انا لسه مجاليش الكاش انت عارف بسبب السنة المالية والبنوك، فهو يوم الحد ان شاء الله هيبقى معايا 35 هيبقوا مرة واحدة»
أبوالفتوح: «خلاص ماشي ياباشا يوم الحد ان شاء الله»
إسلام: «بإذن الله يبقى ما بينا مكالمة الصبح»
- بتاريخ 4/1/2020 وردت محادثة هاتفية بين أبوالفتوح ومحمد القصري، كالتالي:
القصري: «طيب إيه يا خالد خلصت ولا لسه»
أبوالفتوح: «اه خلصت اه»
القصري:«طيب عندك الملف اللى هو بتاع الاستاذ عمر وفي كتالوج كده في الكرسي اللي ورايا انا، الاتنين دول تديهم للأستاذ عبدالحميد ماشي ياباشا»
أبوالفتوح: «ماشي حاضر»
-بتاريخ 4/1/2020 وردت محادثة هاتفية أخرى بين أبوالفتوح والقصري كالتالي:
القصري: «الملف بتاع الاستاذ عمر، اديه للحاج عبدالحميد وقول له يعمل منه نسخة وياخدها ويرجع ده تاني»
أبوالفتوح: «طيب ماشی»
القصري: «مش لازم النهارده یعنی، يرجعه بس يعمل نسخه ويرجع ده»
واستمر الحديث بينهما حول موقف إصلاح وصيانة إحدى السيارات
- بتاریخ 9/1/2020 وردت محادثة هاتفية بين أبوالفتوح وإسلام عزت، كالتالي:
أبوالفتوح: «كلمت محمد بيه ولا لسه ولا إيه والوضع إيه ولا بكره ولا إيه؟»
إسلام: «على إيه بالظبط يا فندم؟»
أبوالفتوح: «على الفلوس بتاعت العربية»
إسلام: «اه ماتقلقش هي متظبطة بإذن الله»
أبوالفتوح: «يعني أجيلكم النهارده مثلا ولا إيه»
إسلام: «لا لا هي مش هتبقي بالمجي هي ليها ترتیب تانى كدهو ها اعرفك عليه»
أبوالفتوح: «یعنی ها تكلمني مثلا لما يكون جاهز معاك»
إسلام: «خليك بس اظبط حاجة معينة واشوف الطريقة اللى أوصلك بيها المعلومة»
أبوالفتوح: «طيب ما تقول لى ياعم اللى انت عاوزه»
إسلام: «مش هينفع مش هينفع»
-بتاریخ 12/1/2020 وردت محادثة هاتفية بين أبوالفتوح ومحمد عبدالحميد، كالتالي:
أبوالفتوح: «ياباشا الباشمهندس مكلمنى دلوقتي من السعودية بيقولي انت ما روحتش ليه لحد دلوقتى لمحمد بيه، قولت له يا باشا كلمت اسلام وكلمت محمد بيه وقالي الحاجه لما تبقى جاهزة هيكلمنى، واسلام قال لي لما تجهز ها اتصل بيك، وهو دلوقتي بيقول لي كلام واسلام بيقول لي كلام تاني»
عبدالحميد: «هو الريس هايجى امته؟»
أبوالفتوح: «الريس هييجي الجمعة إن شاء الله»
عبدالحميد: «طيب استنى لما يجي الريس»
أبوالفتوح: «يعني اتصل عليه، أمال حضرتك قولت له الحاجة جاهزة ليه، ده قال لي روح هناك وكلمني، قولتله يعني اروح بكره ولا اكلمه دلوقتي، قال ليا روح هناك»
وكلمنى، انا مش عارف اجي بكره ولا أعمل إيه يعني»
عبدالحميد: «انا مش عارف اكلمك في التليفون، انا كده كده جي النوبارية ممكن اشوفك»
أبوالفتوح: «انا في الشروق هنا»
عبدالحميد: «طيب خلاص بينا تليفون بكره كده أو بعده»
